ಆದಿಚುಂಚನಗಿರಿ ಮೂಡಲಪಾಯ ಯಕ್ಷಗಾನ ಕೇಂದ್ರ

ಕರ್ನಾಟಕ ಸಂಘದ ಪ್ರಯತ್ನಗಳಲ್ಲಿ ಮೂಡಲಪಾಯ ಯಕ್ಷಗಾನ ಪುನಶ್ಚೇತನ ಕಾರ್ಯವೂ ಒಂದು. ಮೂಡಲಪಾಯ ಯಕ್ಷಗಾನದ ಸರ್ವಾಂಗೀಣ ಪ್ರಗತಿಗೆ ಕಾರಣವಾಗುವ ಅಂಶಗಳಲ್ಲಿ ಹೊಸ ಭಾಗವತರನ್ನು, ಮದ್ದಳೆಗಾರರನ್ನು, ಮುಖವೀಣೆ ಕಲಾವಿದರನ್ನು ತಯಾರು ಮಾಡುವ; ಯುವಕರಿಗೆ ಮೂಡಲಪಾಯ ಹೆಜ್ಜೆಗಳನ್ನು ಕಲಿಸುವ, ಸಾಹಿತ್ಯವನ್ನು ಪರಿಷ್ಕರಿಸುವ, ಪರಿಕರಗಳನ್ನು ಪರಿಷ್ಕರಿಸುವ ಕೆಲಸವನ್ನು ಮಾಡಬೇಕಾಗಿದೆ. ಈ ನಿಟ್ಟಿನಲ್ಲಿ ಜಾನಪದ ಮತ್ತು ಮೂಡಲಪಾಯದ ಬಗ್ಗೆ ಅಪಾರವಾದ ಪ್ರೋತ್ಸಾಹವನ್ನು ಮತ್ತು ಪೋಷಕತ್ವವನ್ನು ನೀಡುತ್ತಿರುವ ಶ್ರೀ ಕ್ಷೇತ್ರ ಆದಿಚುಂಚನಗಿರಿ ಮಹಾಸಂಸ್ಥಾನ ಮಠ. ಇದರ ಪೀಠಾಧ್ಯಕ್ಷರಾದ ಶ್ರೀ ಶ್ರೀ ಶ್ರೀ ನಿರ್ಮಲಾನಂದನಾಥ ಸ್ವಾಮೀಜಿಯವರ ಪ್ರೋತ್ಸಾಹ ಮತ್ತು ಪೋಷಕತ್ವದಡಿ ಕರ್ನಾಟಕ ಸಂಘದ ಆಶ್ರಯದಲ್ಲಿ ‘ಆದಿಚುಂಚನಗಿರಿ ಮೂಡಲಪಾಯ ಯಕ್ಷಗಾನ ಕೇಂದ್ರ’ ಎಂಬ ಸಂಸ್ಥೆಯನ್ನು ಹುಟ್ಟು ಹಾಕಿ ಅದರಡಿಯಲ್ಲಿ ಮೇಲೆ ತಿಳಿಸಿರುವ ಎಲ್ಲಾ ವಿಷಯಗಳಲ್ಲಿ ತಯಾರು ಮಾಡುವ ಪ್ರಕ್ರಿಯೆಗಳನ್ನು ಆರಂಭಿಸಲಾಗಿದೆ. ಈ ಹಿನ್ನೆಲೆಯಲ್ಲಿ ವಾರಾಂತ್ಯ ಶಾಲೆಯನ್ನು ಸ್ಥಾಪಿಸಿ ಈಗಾಗಲೇ 20 ಜನ ವಿದ್ಯಾರ್ಥಿಗಳಿಗೆ ಮುಖವೀಣೆ, ಮದ್ದಳೆ, ಭಾಗವತಿಕೆಯನ್ನು ಕಲಿಸಲಾಗುತ್ತಿದೆ. ಪ್ರಸಂಗಳನ್ನು ಮೂಲಕ್ಕೆ ದಕ್ಕೆಬಾರದಂತೆ ವಿವಿಧ ರೀತಿಯಲ್ಲಿ ಪರಿಷ್ಕರಿಸಿ ರಂಗದ ಮೇಲೆ ತಂದ ಹೆಗ್ಗಳಿಕೆಯನ್ನು ಈ ಕೇಂದ್ರ ಹೊಂದಿದೆ. ಇದುವರೆಗೂ ಮಂಡ್ಯ ತಾಲ್ಲೂಕಿನ ಬೇಲೂರು ಸರ್ಕಾರಿ ಪ್ರೌಢಶಾಲೆ, ಹನಕೆರೆ ವಿವೇಕಾ ವಿದ್ಯಾಸಂಸ್ಥೆ ಹಾಗೂ ಮಂಡ್ಯ ನಗರದ ಸದ್ವಿದ್ಯಾ ಶಾಲೆಯ ಮಕ್ಕಳಿಗೆ ಕ್ರಮವಾಗಿ ‘ಕರ್ಣಾವಸಾನ’ ‘ದೇವಿ ಮಹಾತ್ಮೆ’ ಹಾಗೂ ‘ತ್ರಿಪುರ ದಹನÀ’ ಪ್ರಸಂಗಗಳನ್ನು ಮೂಲಭಾಗವತರು ಹಾಗೂ ಆಧುನಿಕ ರಂಗನಿರ್ದೇಶಕರ ಸಂಯೋಗದಲ್ಲಿ ಕಲಿಸಿ, ಪರಿಷ್ಕರಿಸಿ ನಾವೀನ್ಯತೆಯನ್ನು ತಂದು ವಿವಿಧ ಕಡೆ ಪ್ರದರ್ಶಿಸಲಾಗಿದೆ. ಕರ್ಣಾವಸಾನ ಪ್ರಸಂಗವು ಈಗಾಗಲೇ ದಿನಾಂಕ : 18-04-2021, 29-1-2020, 23-10-2021ರಂದು ಕರ್ನಾಟಕ ಸಂಘದ ಆವರಣದಲ್ಲಿ; 20-11-2021, 27-11-2021ರಂದು ಮಂಡ್ಯದ ಶಾರದಾ ವಿದ್ಯಾಸಂಸ್ಥೆ ಹಾಗೂ ಡ್ಯಾಪೋಡಿಲ್ಸ್ ಶಾಲೆಯಲ್ಲಿ; 10-10-2021ರಂದು ಶ್ರೀರಂಗಪಟ್ಟಣದ ದಸರಾ ಉತ್ಸವದಲ್ಲಿ ಯಶಸ್ವಿ ಪ್ರದರ್ಶನ ಕಂಡಿದೆ. ಅದೇ ರೀತಿ ‘ದೇವಿಮಹಾತ್ಮೆ’ ಪ್ರಸಂಗವು ದಿನಾಂಕ : 05-12-2021 ಹನಕೆರೆ ಗ್ರಾಮದಲ್ಲಿ ರಂದು 8-12-2021ರಂದು ಪಿಇಎಸ್ ಕಾಲೇಜು ವಿವೇಕಾನಂದ ರಂದಮಂದಿರದಲ್ಲಿ; 5-1-2022 ರಂದು ನಾಗಮಂಗಲದ ಆದಿಚುಂಚನಗಿರಿಯಲ್ಲಿ ಜರುಗಿದ ರಾಜ್ಯಮಟ್ಟದ ಯುವಜನೋತ್ಸವದಲ್ಲಿ, 10-1-2022ರಂದು ಬೆಂಗಳೂರಿನ ಎಡಿಎ ರಂಗಮಂದಿರಲ್ಲಿ ಯಶಸ್ವಿಯಾಗಿ ಪ್ರದರ್ಶಗೊಂಡಿದೆ. ಪ್ರಸ್ತುತ ಕರ್ನಾಟಕ ಸಂಘವು ಕೇಂದ್ರದವತಿಯಿಂದ ಮಂಡ್ಯ ನಗರದ ಸದ್ವಿದ್ಯಾ ಶಾಲೆಯ ಮಕ್ಕಳಿಗೆ ಎರಡು ತಿಂಗಳ ತರಬೇತಿ ನೀಡಿ ‘ತ್ರಿಪುರದಹನ’ ಪ್ರಸಂಗವನ್ನು ಕಲಿಸಿದೆ. ದಿನಾಂಕ : 4, 5, 6 ಪೆಬ್ರವರಿ 2022ರಂದು ಮೂರು ದಿನ ಮೂಡಲಪಾಯ ಯಕ್ಷಗಾನ ಉತ್ಸವವನ್ನು ಮಂಡ್ಯ ನಗರ ಪಿಇಎಸ್ ಕಾಲೇಜು ವಿವೇಕಾನಂದ ರಂಗಮಂದಿರದಲ್ಲಿ ಆಯೋಜಿಸಿ ಮೂರು ಪ್ರಸಂಗಗಳ ಆಮೋಘ ಪ್ರದರ್ಶನದೊಂದಿಗೆ ಮೂಡಲಪಾಯ ಕಲೆಯ ಜನಪ್ರಿಯತೆಗೆ ಕಾರಣವಾಗಿದೆ. ಉತ್ಸವದ ಉದ್ಘಾಟನೆಯಲ್ಲಿ ಮಂಡ್ಯ ಲಯನ್ ಮಾಜಿ ಜಿಲ್ಲಾ ರಾಜ್ಯಪಾಲರಾದ ನಾಗರಾಜು ವಿ.ಬೈರಿ, ಖ್ಯಾತ ಮನೋವೈದ್ಯರಾದ ಡಾ.ಟಿ.ಎಸ್.ಸತ್ಯನಾರಾಯಣರಾವ್, ಮೈಸೂರು ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಜಂಟಿ ನಿರ್ದೇಶಕರಾದ ಶ್ರೀ ವಿ.ಎಸ್.ಮಲ್ಲಿಕಾರ್ಜುನಸ್ವಾಮಿ, ಜನತಾ ಶಿಕ್ಷಣ ಸಂಸ್ಥೆ ಅಧ್ಯಕ್ಷರಾದ ಶ್ರೀ ಕೆ.ಎಸ್.ವಿಜಯಾನಂದ ಅವರು ಮುಖ್ಯ ಅತಿಥಿಗಳಾಗಿ ಭಾಗಿಯಾಗಿದ್ದರು. ದಿನಾಂಕ: 14, 15, 16ನೇ ಪೆಬ್ರವರಿ 2022ರಂದು ಮಂಡ್ಯ ತಾಲ್ಲೂಕು, ಆನಸೋಸಲು ಗ್ರಾಮದಲ್ಲಿ ಶ್ರೀ ಆಂಜನೇಯಸ್ವಾಮಿ ಪ್ರತಿಷ್ಠಾಪನಾ ಮಹೋತ್ಸವದ ಅಂಗವಾಗಿ ಕೇಂದ್ರದ ವತಿಯಿಂದ ಕ್ರಮವಾಗಿ `ಕರ್ಣಾವಸಾನ’, `ತ್ರಿಪುರ ದಹನ’, `ದೇವಿಮಹಾತ್ಮೆ’ ಮೂಡಲಪಾಯ ಯಕ್ಷಗಾನ ಪ್ರಸಂಗಗಳನ್ನು ಪ್ರದರ್ಶಿಸುವ ಮೂಲಕ ಮೂಡಲಪಾಯ ಯಕ್ಷಗಾನ ಉತ್ಸವವನ್ನು ಆಯೋಜಿಸಲಾಗಿತ್ತು.